أكثر حاجة مدمرة لنفسية أى طفل؛ إنه يحس بتميز بينه وبين إخواته..فخلى بالك من الاتى : . ١- ماتمدحش طفل قدام اخواته بدون ماتمدحهم هم أيضاً فى...
أكثر حاجة مدمرة لنفسية أى طفل؛ إنه يحس بتميز بينه وبين إخواته..فخلى بالك من الاتى :
.
١- ماتمدحش طفل قدام اخواته بدون ماتمدحهم هم أيضاً فى نفس الوقت...ماتكرهش العيال فى بعضها.
.
٢- لازم تعرف إن مافيش أفضلية للولد على البنت، وإن كل ماتلاقى نفسك بتميل للولد أكثر؛ فاعرف إن ده نوع من الإنحراف السلوكى ( الجاهلية) اللى لازم تعالجه، فعامل بنتك زى إبنك، لو جبت لإبنك حاجة، هات زيها بالظبط لبنتك، لو قعدت مع إبنك ساعة، خلى بنتك معاك فى نفس الوقت،
فهمهم إنك بتحبهم هما الإثنين زى بعض بالظبط.
.
٣- لو فى طفل أصغر من الثانى ومحتاج إهتمام أكثر، خلى بالك من مشاعر الطفل الكبير لأنه مش فاهم إنت مهتم به أكثر ليه، حاول تديله قدر كبير من الإهتمام وتفهمه إن أخوه صغير وخليه يشترك معاك فى توجيهه ومساعدته فهيحس بالمسؤولية تجاهه مش الغيره منه .
.
٤ - ماتقارنش بين ولادك، وتقول فلان أذكى من فلان، وفلان أشطر من فلان وفلان أهدى من فلان..وفلان ده هيطلع دكتور أما التانى ده هيطلع $#$...حرام عليك جدا !
.
٥- فى أباء عندهم حاجة غريبة، يحابى طفل معين، يقلك لأن شبه أبويا الله يرحمه...طب إخواته ذنبهم إيه إنهم مش شبه أبوك ؟!!
.
٦- فى أمهات أكثر غرابة، تحابى بنت لأنها أكثر جمالاً من أختها، فتقول دى العرسان هتقف طابور على دى، أما الثانية فمش هتلاقى مش عارف إيه ...ابقى قابلينى لو اتجوزتى!!!
مش فاهم الست دى فين دماغها ..دماغ مجرمة !
الجواز لا ليه علاقة بالجمال ولا غيره...ياما بنات إتجوزوا وهم جمالاً اقل كثيرا من بنات أخرى لسه ماتجوزوش..ده أمر مكتوب، زى الصحة والفلوس والحياة والموت...بتعايريها على إيه !!
أمهات محتاجه تتربى والله !
.
٧- ولادك لو كبار، لو هتجيب لحد حاجة، هات زيها لاخواته، موضوع البنت نصف الولد ده مش فى حياة الأب، ده أمر خاص بالميراث فقط وليه أسبابه، إنما فى حياتك لو هتجيب لإبنك حاجة،يبقى تجيب لبنتك نفس الحاجة أو مايعادلها.
.
٨ - إبنك اللى بتهتم به أكثر هياثر على شخصيته، هيحس إنه أعلى من غيره، لما يكبر ويتعامل مع الناس، هيفضل يتعامل معاهم بنفس الفكر ده، فيهصاب بصدمة نفسية كبيرة لأنه مش هيلاقى نفس الإهتمام الزائد اللى كان بياخده عن غيره، فيتحول لشخص غيور، حقود، يحاول يعمل أى حاجة علشان يفضل فى نفس المكانة من التميز اللى طول عمره بياخده، فاهتمامك الزائد ليه عن إخواته بيدمر شخصيته بمعنى الكلمة .
.
٩- - إبنك اللى بتهتم به أقل، بيتحول لشخص حاسس بالظلم وإن ليه بيعاملونى كده، وإخواتى أفضل منى فى إيه، وقد يتطور الأمر إلى كره للأب أو الأم وإخواته بسبب الموضوع ده ويتحول لشخص عنده كبت ومستنى أى فرصة يخلص فيها من الوضع ده .
فانت هنا بتشكل شخصية غير سوية للجميع !
.
١٠ - ربى ابناءك من خلال قاعدة ( سنشد عضدك بأخيك ) !!
.
.jpg)
ليست هناك تعليقات