رحلة الى ماليزيا .. تقرير شامل بالصور وكافة التفاصيل الجزء الثاني

نكمل التقرير لليوم الاول بماليزيا
اليوم الاول بكوالالمبور واكتشافها

بعد ما انهينا اجراءات الدخول اخذنا تاكسي من المطار الى الفندق بقيمة 75 رنجت

المسافة كانت 45 دقيقة للفندق تقريبا
الفندق دورسيت ريجنسي 4 نجوم
يقع خلف شارع العرب

طبعا الشارع اسمه بوكيت بينتانج وليس شارع العرب
بس الناس سمته بهالاسم لكثرة تواجد العرب فيه

وانا تعمدت اختار فندق يكون قريب من شارع العرب
لأن معظم الوقت بتكونين تتمشين فيه ... مطاعم وكوفيهات واسواق
التمشية فيه حلووووة جداااا

هذي بعض الصور للوبي بالفندق
وصلنا للفندق الساعة 8 الصبح

طبعا الشك ان لازم يكون الساعة 12 الظهر
واحنا جايين قبل ب 4 ساعات
وبلغونا ان الفندق فلللل ومافي غرف فاضية

فقررنا انا وزوجي نروح ونتمشى شوي حول الفندق
طلعنا من هناك ومشينا سيييييدا وشفنا بعد 10 دقايق مشي مجمع وفندق برجايا التايم سكوير المعرووووف
وقلنا الحمد لله نتمشى فيه الى ان يصير الساعة 12

لكن صدمنا انه مجمعاتهم نظامها بريطاني تفتح الساعة 10 وتسكر الساعة 10 هذا الشي ابدا ما عجبني بمجمعاتهم

اترك لكم الصور

شفنا جنب المجمع من برا في كرسبي كريم قلنا ندخل وناكل منه دونات ونرتاح شوية
اخذنا 3 حبات دونات وكوب كوفي وموية ب 22 رنجت

بعد كذا طلعنا ورجعنا للفندق الساعة 9 ونص تقريبا
والحمد لله لقينا في غرفة فضت علشاننا فحمدت الله اني واخيرا بناااااام

هذي صورة من جلسة اللوبي

وهنا اترككم مع صور الغرفة

صور لمطل الغرفة في كذا وقت من اليوم النهار والليل

نمنا عالساعة 10 تقريبا وجلسنا الساعة 2 الظهر طبعا انا ناااايمة وما ابي اجلس
وزوجي يحاااول فيني وانا ودي اظل نايمة
بس جلست نفسي غصب حتى ما يروح يومنا عالفاضي
طبعا جلسنا جوعانين فتوجها لمطعم الطربووووش المطعم موجود من زمان ومرررة حلو ونظيف ما شاء الله وحتى اسعاره كانت حلووووة
طلبنا صحن واحد مشويات وصحن حمص وصحن ورق عنب ومشروبين غازيين
وطلع الحساب 85 رنجت اللي يقول السعر غالي فهو غلطان
لأن نفس هالطلب نطلبه من اي مطعم بالدمام ويكون سعره ما يقل عن 80 ريال يعني السعر بماليزيا زيادة 20 او 30 ريال فقط يعني ماكو فرق واجد

ابي اكتب لكم وصف كيف تروحو لشارع العرب من الفندق
لما تطلعوا من الفندق بتشوفو فندق ثاني جنب فندقنا بيننا وبينهم شارع ناسية اسم هالفندق
المهم تطلعو من هالشارع سيدا الى ان ينتهي بكم الشارع
وبعدين تروحو يمين وتمشو سيدا الى ان ينتهي بكم الشارع بعد على شارع رئيسي

وبتشوفوا شارع عام وقدامكم مباشرة مجمع البافليون فيه كل الماركات العالمية
المهم لما ينقطع فيكم الشارع تروحوا يسار وظلي امشي سيدا الى ان تشوفوا على يدكم اليمين مطعم الطربوش وجنبه مطعم طاجين اللبناني او المغربي وجنبه مطعم بابل العراقي
لما توصلوا هناك تكونو وصلتو لشارع العرب

مقتطفات وصور للشارع

وهنا دخلنا مجمع لوت 10

وبعدين طلعنا من بوابة ثانية تطلع لمجمع البي بي بلازا

دخلنا البي بي بلازا
واشترينا من هناك شريحة جوال وكريم الزنجبيل يقولون زيين للبشرة مع بلوزة عليها رسمة البرجين ومراية صغيرة عليها نقش البرجين كلهم ب 130 رنجت

قررنا انا وزوجي نروح للبرجين التوأم اللي كانو اطول برجين بالعالم قبل لا يجي برج خليفة بدبي
وهالبرجين بصراحة شي عجييييييب
طبعا ما تقدري تروحي مشي من شارع العرب للبرجين
ولو اخذنا تاكسي بيقصنا قص بياخذ 15 رنجت روحة و 15 رجعة
قررنا نروح بالقطار المونوريل حقهم (القطار المعلق)

كانت تجربة القطار فريدة ومميزة وممتعة اكثر من التكاسي
تخيلو كلفتنا الروحة انا وزوجي لوحدنا 3 رنجت فقط بس احنا غلطنا غلطة كبيرة بعدين اكتشفتها
رحنا الى محطة اسمها بوكيت ناناس
وفي قبلها محطة اسمها راجا شولان هي اللي قريبة من البرجين اكثر من بوكيت ناناس
من محطة بوكيت ناناس الى البرجين مشي 10 دقايق
لكن من محطة راجا شولان الى البرجين مشي 5 دقايق

عالعموم احنا رحنا الى بوكيت ناناس لأن ما كنا ندري

وهنا صور متفرقة اثناء مشينا من المحطة للبرجين

وهنا بينو البرجين التوأم <<<< اموووووت عليهم تصميمهم مررررة عاااجبني

وهذي صورة من داخل

و هناك تخيلووو مين شفنا؟؟

شفنا اللي صمم البرجين التوأم كان توه راجع من السفر

والناس كللللها ملتمة حوله تصوووور

بس أنا كنت حددددي تعبانة وقلت ليش اصوره واتعب نفسي

وميزة البرجين انه في حديقة كبيييييرة وحلوووووة خلف البرجين
يا ربييييي تجننننن الجلسة فيها ترد الروووووح

وهنا انا ما صورت كثييير لأنه ززززحمة فصورت بيوم ثاني كنا جايين من الصبح الساعة 8

وهنا شفنا بنات صغار جايين رحلة من المدرسة يحليلهممم يهبلووووون

وخلف هالحديقة في الأكواريا عالم تحت البحار ما دخلناها لأني كنت تعبانة حدددددي

بس دخلنا المبني نفسه وكان حلووو

وبعدين رجعنا للفندق طبعا انا كنت حدددددي تعبانة بس زوجي يبي يطلع
ما منعته وقلت لااا
لأن زوجي يحب الشيشة فراح لمطعم يشيش <<<< ودي اخليه يترك هالعادة بس مو قادرة

عالعموم انا رتبت اغراضنا ونمت شوية جاني عالساعة 7 يجلسني وما رضيت اجلس فنام معي
والساعة 9 جلست وجلسته معي

ورحنا لمجمع التايم سكوير نتعشى قبل لا يسكرون
لأن زي ما قلت لكم الساعة 10 يسكرون

صور من الطريق

تعشينا بماكدونالدز
:adore:
ماكدونالدز هناك احلى من عندنا بكثييييير هذي وجهة نظري انا وزوجي
انا دائما طلبي بيج ماك تشيكن
اللي هناك مقرمشة وحاااااارة فلفل لذييييذ حددده :adore: وتجيك ساخنة بشكل مو طبيعي
والمايونيز حقهم احلى من هنا تحسينه مافي دهون كثير زي عندنا:adore: بس انهم يبيعونه
يعني لو تطلبي مايونيز زيادة لازم تدفعي 1 رنجت
بس يستاهل :!!: لأنه خفيف ولذيذ جدا