مقال يعالج مشكلة الانطباعات السلبية

السلام عليكم ورحمة الله وبركاته  مشكلة الانطباعات السلبية اللي بيفرضها المحيطين علينا .... وكيف تتعاملي فيها مع طفلك  مقال يعالج ...

السلام عليكم ورحمة الله وبركاته 

مشكلة الانطباعات السلبية اللي بيفرضها المحيطين علينا .... وكيف تتعاملي فيها مع طفلك 

مقال يعالج المشكلة دي اللي كتير من الناس والمحيطين بيؤلموا غيرهم بيها 

........

"الولاد بيتريقوا علي في المدرسة و بيقولولي يا سودا"

"صحابي في التمرين بيضحكوا علي،بيقولوا علي بطئ"

 "خالو دايما يقولي يا تخينة "

مشهد محزن كتير مننا اتعرضله شخصيا أو شافه في ولاده...

1-علموا ولادكم أنهم مختلفين و الناس دايما بتخاف من المختلف....

احكيلهم عن أن السود بيتريقوا علي البيض 

و أن الي عينيهم ضيقة شايفين الي عينيهم واسعة مرضي...

البشر بيخافوا من المختلف عنهم....

لأنهم مش عارفينه....

 يعني أنت عشان مختلفة ، و هم بيخافوا من المختلف فبيتريقوا عليك...

2- علميهم يردوا إزاي ...

قولهم "أنا سرعتي كده مش لازم كلنا نبقي زي بعض..."

قوليلهم " أنا لوني كده جميل و مختلفة....

ربنا خلق الجمال في كل لون ده ابداع"

 قوليله " أنا وزني مختلف و صحتي كويسة جدا و ده المطلوب"

3- اعطيهم جرعة ثقة في النفس

خدي ابنك أو بنتك أدام المراية و عرفيهم إزاي كل حاجة في جسمهم آية و ابداع....

اكتبوا في ورقة أد إيه هم شاطرين في حاجات و مبدعين...

 اتكلمي عنهم بإيجابية أدامهم....

ناس كتير الكلام الي كان بيتقالهم و هم صغيرين خلاهم ياخدوا قرارات غلط في حياتهم....

أو يعتنقوا أفكار غلط....

علمي ولادك يتعاملوا إزاي مع سخرية و نقد الناس....

 تبقي أعطيتيهم أداة مهمة جدا تنفعهم طولةعمرهم....

د . مي المشد