رسالة اقدمها للازواج بلسان كل اب

السلام عليكم ورحمة الله وبركاته  رسالة اب لزوج ابنته  رسالة اقدمها للازواج بلسان كل اب ربى وتعب وصرف وقته وجهده وماله على احب النا...

السلام عليكم ورحمة الله وبركاته 

رسالة اب لزوج ابنته 

رسالة اقدمها للازواج بلسان كل اب ربى وتعب وصرف وقته وجهده وماله على احب الناس اليه .. وهما ولاده وبناته .. لحد موصلهم لليوم اللي كان مستنيه ليوم جوازهم لليوم اللي كانت فيه بنته عروسة في الكوشة وودعهم وهوا بيتمنى ليهم حياة سعيدة 

رسالة قررت اكتبها لما وصلني من استشارات بمشكلات ضخمة جدا نتيجة اهانات مستمرة وقلة قيمة وضرب وسب وشتم من الزوج لزوجته ...

رسالة طالبتني بيها اكتر من انسانة فاضلة اني اكتبها للازواج كنصيحة او عتاب لعل الله يغير بيها شء من اللي بحصل في البيوت من اهانات وشتائم وافعال لا ترضي الرب في عليائه ولا يقبلها اي انسان ..

رسالة احببت اكتبها بلسان اب بيكلم فيها زوج بنته ... واسال الله ان يهدي كل زوج للخير والصلاح وان يكشف الكرب عن كل زوجة مبتلاة بمثل هذا البلاء وان يحفظ بناتنا وبنات المسلمين جميعا من كل سوء ولا يوقعهن ابدا تحت يد من لا يرحم ضعفهن ولا يرعى حرمتهن يارب 

وابدؤها ببسم الله الرحمن الرحيم

ابني الغالي وزوج ابنتي 

يا من ائتمنتك على احب الناس اليا واعطيتك قطعة من كبدي .. وزوجتك اياها وهي احب الناس ليا ..

تفتكر يا ابني يوم ما دخلت بيتي وطلبت ايد بنتي .. مكنتش الفرحة سايعانا بيك .. وقلت ان هوا ده الراجل اللي هيصون بنتي ويقدرها .. 

هوا ده الراجل اللي هطمن على بنتي معاه 

هوا ده الراجل اللي هموت وانا مستريح ان بنتي عنده في بيته 

هيصونها ويحترمها وهيشيلها في عينيه 

فاكر يا ابني لما قلتلك ليلة دخلتكم .. قلتلك وانا ماشي وبقفل بابكم عليكم وانا خارج .. قلتلك بنتي امانة عندك خد بالك منها ... 

فاكر قلتلي ايه 

قلتلي في عنيا يا عمي هشيلها في عينيا 

لمحت الفرحة في عينك ساعتها .. وحسيت بصدقك ساعتها وصدقت واطمنت وروحت بيتي وانا الفرحة مش سيعاني وحمدت ربنا وشكرته وفضلت اصلي طول الليل وادعيلكم بان ربنا يملا حياتكم سعادة وفرح ورضا واطمئنان ... 

بس يابني مرت ايام كتير كانت بنتي بتجيني وهيا سعيدة ومبسوطة وبتشكر فيك وبتقول عنك قصايد شعر عن حبك لها واحترامك لها وانك محسسها انها ملكة على عرش قلبك ... وساعتها كل مرة اوصيها انها تكون لك كما تحب وكما يرضيك في طاعة الله .. 

فكانت تبقى مستعجلة انها ترجع بيتك وبقت تقول اروح وكنت سعيد بانها بتقول اروح على بيتك انتا مش على بيتي اللي اتربت فيه عمرها كله 

كنت مبسوط اوى بيها وبيك وياما دعيت لك انا وحماتك ودعيت ليك ولاسرتك الفاضلة اللي ربتك على كل خير

ولكن جات عليا ايام يا ابني كانت بنتي تجيني مهمومة وحزينة ... عينيها مليانة دموع بس مش بتتكلم معايا .. بسالها تقول مفيش لكني كنت متاكد انها شايلة هموم كتير وساكتة 

فطلبت من حماتك تسالها امها .. لكن بنتي كانت حريصة جدا انها متهزش صورتك عندنا .. حاولت كتير تخبي لكن يابني العلامات اللي كانت في جسمها اللي كانت بتخبيها عني امها شافتها فانهارت بنتي وهيا بتبكي 

عرفت اسوا مفاجأة في حياتي 

عرفت ان بنتي الغالية عليا اللي عمري ما مديت ايدي عليها بتنضرب 

وبتنضرب من مين ؟ من الراجل اللي المفروض تتحامى فيه من كل الدنيا 

ليه يابني كده 

يابني انتا واخد بنتي من بيت بيحترمك وبيقدرك 

بيت عمره ما اهانك ولا اهان حد من اسرتك 

يا ابني احنا احترمناك وقدرناك وشيلناك في عيوننا .. 

لنفترض انك يا ابني اختلفت مع بنتي ... 

وايه يعني يابني ؟

ما كل اتنين بيتجوزوا ويبدؤوا حياتهم او حتى يعيشوا مع بعض كتير لازم يختلفوا .. بس المهم يعرفوا ازاي يختلفوا وازاي يعالجوا مشكلتهم

لكن هل معنى كده يابني انك تضرب حبيبتك وحبيبتي وبنتي 

قدرت ايدك تطاوعك وتمد ايدك على اللي حبتك واداتلك عمرها وهيا على استعداد لحد دلوقتي تفديك بعمرها 

واي مشكلة يا ابني بالهدوء لها الف حل ولها الف دوا 

لكن جرح الكرامة يا ابني مالوش اي دوا 

هل يابني ترضى ان بنتك حبيبتك اللي هتتعب في تربيتها وهتحبها اكتر من روحك 

يا ترى هيكون شعورك ايه لما تجيلك وهيا مضروبة ومتهانة من جوزها ؟

يا ترى شعورك ايه وانتا في مكاني كده وانتا مش عارف تعمل ايه ؟

وانتا مصاب بالحيرة والالم الشديد 

انك تطلب منها انها تصبر على اللي بيحصل لها ده عشان اولادها وولادك وده بيقتلها كل يوم ملايين المرات 

او تحاول انك تخلصها وتطلقها وانتا عارف ان دي مش نهاية لمشاكلها بل بداية لمشكلات جديدة اكبر ليها ولاولادها 

حيرة ان عمرك كأب بيكبر وصحتك بتضعف ومنتش عارف تعمل ايه ...

يابني كما تدين تدان ... وكل ظلم بتعمله هيترد لك بس والله لو حصل لك او لاي حد من طرفك اذى هياذيني 

لاني كنت ولازلت معتبرك ابن ليا 

اديتك اكبر كنز حوشته في حياتي 

يابني بعتلك الرسالة دي وكلي امل انك ترجع للي كنت عليه لاني مش عاوز ولا حابب اسعى في خراب بيت وظلم لاولاد بس دي بنتي

يا ابني انا مستنى الانسان اللي دخل بيتي وقلتله زوجتك ابنتي على كتاب الله وعلى سنة رسول الله 

فهل يا ابني اللي بيحصل ده يرضي الله ورسوله 

انا مستني يا ابني ان بنتي تدخل عليا وهيا بتضحك زي ما كانت متعودة وهسالها عنك 

ومستنى تقوللي نفس الكلام الجميل اللي كانت بتقوله عنك دايما .... 

لانها حتى اللحظة اللي بكتب لك فيها بنتي متعرفش اني عارف اي شء 

فخليني يابني قدامها مش عارف لان كسرة البنت قدام ابوها صعبة .. والاصعب حزن الاب على بنته وهيا بتتهان من الراجل اللي هيا في امانه في ايده

يا ابني الرجولة مش في انك تضرب الرجولة الحقيقية انك تحترمها وهيا تحترمك في غيابك وفي حضورك 

الشهامة مش انك تستقوى على الاضعف منك لان البنت والست مهما كانت ضعيفة واسيرة عندك 

وبكرة تجرب وتفتكر كلامي 

ويارب يارب يارب ميجي عليك يوم زي ده انك تضطر انك متلاقيش وسيلة تحمي بنتك بيها غير انك تساعدها على هدم البيت اللي هيا اتحملت كتير عشان يبقى موجود ويستمر 

دي رسالتي ليك يا ابني 

واتمنى انك ترجع كما كنت 

‫#‏يحيي_البوليني‬