السلام عليكم ورحمة الله وبركاته تجربة تربوية رائعة هتفيدك وهتريحك وهتعمليها كتير باذن الله ... كتير من الناس بتقع في خطأ من اتن...
السلام عليكم ورحمة الله وبركاته
تجربة تربوية رائعة هتفيدك وهتريحك وهتعمليها كتير باذن الله
...
كتير من الناس بتقع في خطأ من اتنين في رؤيتها لنفسها
ففيه ناس تقيم نفسها تقييم اكتر من الطبيعي ... فتشوف نفهسا اعلى من حقيقتها وتغتر بحالها
وفيه ناس ودول الاكتر بيقيموا نفسهم بظلم
بيشوفوا نفسهم اقل من حقيقتها
بيظلموا نفسهم في تقييمها
وبالتالي ممكن يقبلوا بنظرة غيرهم لهم على انهم مقصرون في حياتهم
وممكن كمان يشعروا انهم معملوش شئ كويس في حياتهم
وبالتالي ممكن يشوفوا انجازاتهم الكبيرة على انها عادية او اقل من العادية
والحقيقة دول لازم ينتبوا شوية
لانهم بالفعل لابد يقيموا نفسهم صح
عشان يتعاملوا صح في حياتهم
وعشان هما كمان يسعدوا بيها ويسعدوا بنفسهم وبانجازاتهم
وانا ادعو كل ام وكل زوجة وكل فتاة او سيدة
وانصح الجميع باعادة تقييم النفس
اعادة نظرة للنفس
لاننا اذا ظلمنا نفسنا من ينصفها ؟
واذا نظرنا لنفسنا نظرة فيها انتقاص هل نستنى ان حد هيرفعها ؟
معرفة قيمة النفس لا هوا ضد حق الزوج
ولا ضد حق الاولاد
ولا حتى ضد حق الاهل والاسرة في البر
بل يفيد كل العلاقات دي
فاقترح عليكم
ورقة وقلم ووقت متفرغ تكونوا فيه لوحدكم
وتكتبي في الورقة دي انجازاتك حتى لو كانت صغيرة
وقسميها
انجازات مع الزوج
انجارات مع الاهل
انجارزات مع الابناء
وكل خطوة اكتبي انجازك
اكتبي قد ايه عانيتي عشان النتيجة دي
وسيبي فراغات في كتابتها عشان كل ما هتقري هتفتكري انجازات كانت غايبة عن ذاكرتك
اكتبيها واعصري مخك فيها
ولما تخلصيها
استرخي كده شوية
وارجعي اقريها
اقريها كأنك بتقري عن حد غيرك
وشوفي الشخصية اللي بتقري انجازاتها دي تستحق منك ايه
لو هتبكي ابكي
بس اكيد هيكون بكاء فخر
بكاء اعتزاز
دموع فرح بالانجاز
حتى لو لم تبكي
سيمتلئ صدرك فرحا بانجازاتك اللي انتي اصلا نسيتيها
وهتشعري بالفخر بكل شئ انجزتيه
ساعتها هيروح الاحباط اللي ممكن اي حد يصدرهولك
وساعتها هتشوفي مشاكلك على حقيقتها
مشاكل عادية مش اكبر من اللي مريتي بيها
مشاكل تقدري عليها
باذن الله هتقدري عليها
وكل متحسي باحباط او حد يحب انه يحبطك
روحي لسجل حياتك افتكريه واسعدي بيه
وانا متاكد هتقريه كتيييييييييييير
عشان تفكري نفسك دايما بنفسك
وانها لها اكبر الحق عليكي بعد حق ربنا
فمع كونك هتدي لكل صاحب حق حقه
الا ان لنفسك عليكي حق
وحق اصيل كبير حق النفس على الانسان
وده مش كلامي
ده كلام سمعه النبي صلى الله عليه وسلم ان سلمان الفارسي نصح اخاه ابا الدرداء - رضي الله عنهما - به
فقَالَ لَهُ سَلْمَانُ: "إنَّ لِرَبِّكَ عَلَيْكَ حَقًّا، ولِنَفْسِكَ عَلَيْكَ حَقًّا، ولأَهْلِكَ عَلَيْكَ حَقًّا، فَأَعْطِ كُلَّ ذِي حَقٍّ حَقَّهُ".
فَأَتَى النَّبِيَّ - صلى الله عليه وسلم - فَذَكَرَ ذَلِكَ لَهُ، فقَالَ النَّبِيُّ - صلَّى الله عليْه وسلَّم -: ((صَدَقَ سَلْمَانُ))؛ رواه البُخاري.
ليست هناك تعليقات