هل الصوت العالي وراثة ؟

السلام عليكم ورحمة الله وبركاته  لفت نظري سؤال طرحته اخت فاضلة على الصفحة لقضية مهمة يجب تناولها بدقة في صفحتنا الاجتماعية السؤال كان عن ...

السلام عليكم ورحمة الله وبركاته 

لفت نظري سؤال طرحته اخت فاضلة على الصفحة لقضية مهمة يجب تناولها بدقة في صفحتنا الاجتماعية
السؤال كان عن الصوت العالي في ابنائها ... فسالت سؤال ... 
هل الصوت العالي وراثة ؟
والحقيقة انها لفتت نظري لموضوع في غاية الخطورة 
لشماعة ممكن يعيش على وهمها ناس كتير 
يعيشوا عليها اعمارهم كلها لحد ما يموتوا ويلقوا الله وهما بيتكلموا عن نفسهم ويوصفوا نفسهم ان تصرفهم وسلوكهم وراثي
يعني العصبي يقول انا عيلتي كلها عصبية وانا زيهم
قليل الاحتمال يقول ان عيلتي كلها خلقها ضيق وانا زيهم
الست العصبية تقول انا عائلتي كلها عصبيات وانا زيهم
وهكذا في اي سلوك انساني او خلقي يبرره ويقول انه وارث هذه الصفات
وعلى الرغم ان فيه علماء غربيين كتير قالوا بان السلوك الانساني مككن يكون وراثي الا ان كلامهم مش حقيقة علمية يقينية لان كتير من العلماء الاخرين اكدوا العكس
وخلينا نبدا الكلام من اوله ...
دلوقتي هل فعلا السلوك الانساني وراثي ؟
لا يمكن الاقتناع بكده ان السلوك الانساني وراثي لاسباب :
- لو السلوك الانساني وراثي يبقا الانسان مجبور عليه .. ولو بقا مجبر عليه يعني ان اي خطا بيرتكبه هوا ليس له دخل في ارتكابه له ....
يبقا ازاي ربنا العادل الحكيم هيحاسبه وهيعاقبه لو فعلا مالوش دخل فيه ..؟
هل يمكن تصور ان ربنا هيضع فيه سلوك معين وراثيا ولا يقدر الانسان انه يغيره او يتحكم فيه ثم بعده يحاسبه ؟؟؟
***
- السبب التاني ... طيب لو افترضنا جدلا ان التوريث السلوكي حقيقي ..
ليه بقا بنشوف اتنين اخوات من اب واحد وام واحدة بل ممكن نلاقي توؤم كمان .. ونلاقيهم سلوكهم مختلف عن بعض بل يمكن سلوكهم عكس بعض تماما ...؟
ليه بقا لو حقيقي ان السلوك يورث ليه اختلف الاخوات عن بعض .؟
***
- السبب التالت لو فعلا السلوك بيورث .. طيب لما تطلع تطلع تطلع لغاية ابونا ادم عليه السلام .. كلنا هنرجع لاب واحد وام واحدة ... مش لو كان بيورث كان المفروض اننا كلنا يبقى سلوكنا وتصرفاتنا واحدة عشان كلنا من اب واحد وام واحدة ؟
ليه اختلفنا لو ده صحيح ؟
**
اذن وبحسب الادلة دي مفيش شئ اسمه توريث السلوكيات
ممكن اه ان البيئة هيا اللي تساعد على نمو السلوك عند الانسان
يعني الطفل لما يبدا يظهر منه عصبية يقولوا ااااه اصله طلع لابوه عصبي زي ابوه او عيلته كلهم عصبييين ... هيطلع لمين يعني ... هيجيبه من بره ... وووو
. فالطفل يسمع التعزيز ده فيتاثر ويتمسك بالسلوك ده حتى لو غلط
انما في النهاية
مفيش حد مجبر على سلوك
مفيشش حد يعيش بوهم انه كده واهله كده فانا طلعت كده ومش هتغير عن كده ومفيش الا كده
وهممممممم كله وهم
اي سلوك عندك مهما كان سنك ممكن تغيره
بس بشرط
انك تكون فعلا عاوز تغيره
مش تدعي انك بتحاول تغيره
#يحيي_البوليني