تعاملوا مع الاطفال كما هم

السلام عليكم ورحمة الله وبركاته  الواد ده سوسة البنت دي سهنة مع بدائية الكلمات واللي ممكن متكونش مفهومة لغير المصريين وللاسف انا لا ا...

السلام عليكم ورحمة الله وبركاته 

الواد ده سوسة
البنت دي سهنة
مع بدائية الكلمات واللي ممكن متكونش مفهومة لغير المصريين
وللاسف انا لا اعلم مرادفاتها ايه في اللهجات غير المصرية
لكني على ثقة انها كلمات موجودة في كل اللهجات وكل الثقافات وكل الاوساط 
وهي اتهام الاطفال بانهم بيفعلوا اشياء من ظاهرهم وبيقصدوا بيها شئ تاني من باطنهم
يا افاضل
كل انسان بيولد بتكون المساحة بين ظاهره وباطنه بتساوي صفر يعني بيكون ظاهره متطابق تماما مع باطنه
عشان كده الطفل عفوي
لو حب حد او شئ بيقول بيحبه
لو كره حد او شئ بيقول بيكره
لو اراد شئ بيطلبه
وتتسع المساحة تدريجيا بين الظاهر والباطن في الانسان بكبر سنه
فيمكن ان يتصرف تصرفات في ظاهره عكس باطنه تماما
ومن الناس من تستطيع ان تحافظ على ضيق المساحة دي فبيكون ظاهرها قريب جدا من باطنها
وده ناس كتير بتحب تتعامل معاه وتقول عليه عفوي او تقول عليه زي الطفل الصغير فيه براءة الاطفال
يعني دي ميزة وصعب ان اي انسان يحافظ عليها
اذن تصرفات الاطفال لا فيها مكر ولا خداع ولا فيه طفل سهن ولا طفلة سوسة
بل احنا اللي بنظلم الاطفال لما بنوصفهم بكده
ويمكن احنا اللي بنزرع فيهم الموضوع ده لما هما يلاقونا بنتكلم عن السهن والسوسة بصيغة الاعجاب
يبقا ليه هوا بجد بعد كده مادام السلوك ده عاجبكم ليه ميكون سهن والبنت ليه متكونش سوسة
وفي الاخر احنا اللي نشتكي منهم
مين خلى الابن سهن ؟
ومين خلى البنت سوسة ؟
#يحيي_البوليني