الحياة الزوجية تحتاج للتلات مراحل ؟؟

السلام عليكم ورحمة والله وبركاته  عاوز اتكلم مع حضراتكم في فكرة تربوية رائعة ناتجة من قصة خيالية مفترضة بس الحقيقة رائعة ومعبرة ...

السلام عليكم ورحمة والله وبركاته 

عاوز اتكلم مع حضراتكم في فكرة تربوية رائعة ناتجة من قصة خيالية مفترضة بس الحقيقة رائعة ومعبرة ومهمة للغاية

الفكرة دي تتخلص في ان فيه كائنات عايشة على كوكب المريخ 

وزي ما حضراتكم عارفين كوكب المريخ كوكب صلب جامد قوي كله احجار وصخور 

الكائنات اللي عليه اخدت من خواصه 

بقت كائنات صلبة جامدة خشنة 

الكلمات عندها قليلة والافعال كتيرة 

معيار تفاضلهم الوحيد هوا القوة 

بيتمايزوا بيها 

بيتفاخروا بيها 

ان حبوا حتى يهزروا او يتباسطوا مع بعض بيكون الاحتكام عندهم لمن الاقوى 

حتى في العابهم ورياضاتهم .. كلها خشنة ... كلها بتحتكم للقوة 

كلماتهم رقمية عشان الارقام محددة بتبين مين الاعلى والاقوى بوضوح 

العواطف عندهم قليلة جدا 

واصلا تعاملهم مش بيها وربما بيعتبروها ضعف كمان 

...

وبالمقابل فيه كائنات عايشة على كوكب اسمه الزهرة

الكوكب ده باين من اسمه انه كوكب رقيق 

الكائنات اللي عليه اخدت من صفاته 

كائنات رقيقة ناعمة جميلة وحنونة 

الكلمات عندهم كتيييييييير واكتر بكتير من الافعال 

معيار تفاضلهم الجمال 

بيتمايزوا على بعض بيه 

وبيتفاخروا بيه 

وان حبوا يهزروا او يتباسطوا مع ببعض بيكون الاحتكام عندهم لمن الاجمل 

حتى في العابهم ورياضاتهم .. كلها ناعمة... كلها بتحتكم لابراز الجمال

كلماتهم مش رقمية عشان الارقام بتخنقهم ببيتكلموا بالمشاعر 

العواطف عندهم كتيييييييييييييييرة جدا 

واصلا تعاملهم دايما بيها لانهم بيعتبروها المعيار الوحيد او الاكثر مصداقية لتقييم اي شئ 

..

وتكلمة الحكاية الخيالية .المعبرة والمهمة ..

مجموعة من الكائنات اللي من المريخ نزلت على الارض وكانوا فئة الذكور او الرجال 

ونزلت مجموعة تانية من اللي ع الزهرة وكانوا فئة الاناث او السيدات 

وهنا التقوا 

وهنا كل واحد منهم شاف واحد تاني من غير نوعه 

فاقتربوا من بعض 

وتزوجوا 

ولكن ....

وما ادراكم ما بعد لكن 

ظن المريخي ان الزهراء مريخية مثله .. فصار يعاملها بمنطق القوة .. ليثبت قوته .. ويطلب منها ان تكون مريخية كما اعتاد ..

وظنت الزهراوية ان المريحي زهراوي مثلا .. ولكن وجدته يفتقر لكل ما تحمله من صفات الزهراويات 

وهنا حدث الصدام ..

المريخي يريدها مريخية ..

والزرهاوية تريده زهراويا ..

وهو لن يكون زهراويا 

وهي لن تكون مريخية 

فحدثت المشكلة بينهما 

مشكلة تكمن في امرين 

اولهما : عدم فهم كل منها الاخر 

وثانيهما : رغبة كل منهما في تحويل الاخر ..

وكل منهما لن يتحول ..

فلابد من حلول للاقتراب 

اولها الفهم لطبيعة الاخر .. المريخي يفهم ان الزهراوية مختلفة عنه قيمها مختلفة افكارها مختلفة كل شئ فيها مختلف عن عالمه المريخي 

والزهراوية تفهم ايضا ان المريحي مختلف عنها في قيمه وافكاره وكل شئ فيه مختلف عن عالمها الزهراوي 

وثاني شئ بعد الفهم الاستيعاب 

استيعاب الاختلاف .. وان علاقة الرجل والمراة وبناء البيوت مش مبنية على التشابه بل مبنية على التكامل 

ففيه صفات مش فيها 

وفيها صفات مش فيه

وربنا خلقهم مختلفين ليتكاملوا مش ليتطابقوا 

وثالث الخطوات الاقتراب 

فالمريخي يحاول الاقتراب من الزهراوية وهو متفهم ثم مستوعب للاختلاف

والزهرواية تحاول هي ايضا الاقتراب وهي متفهمة ومستوعبة 

ونلتقي في منتصف الطريق 

لا هوا يجمد في مكانه ويستناها تروحله 

ولا هيا تتجمد في مكانها وتستناه يروح لها 

الحياة الزوجية تحتاج للتلات مراحل دول 

الفهم

الاستيعاب 

التقارب 

وفقكم الله في حياتكم الزوجية 

على فكرة ...

الكلام والصياغة واقتراحات الحلول من كلامي 

لكن الفكرة الاساسية جاءت في كتاب للكاتب الانجليزي جون جراي في كتابه الرائع اللي اترجم لعشرات اللغات واللي اتباع منه ملايين النسخ 

#الرجال_من_المريخ_والنساء_من_الزهرة

وباذن الله ابقى اضعه هنا كملف للتحميل 

#يحيي_البوليني