السلام عليكم ورحمة الله وبركاته (2) من بعد ما نزل رجال المريخ وعاشوا ع الارض واتجوزوا بنساء الزهرة عاشوا مع بعض فكان اغلب ...
السلام عليكم ورحمة الله وبركاته
(2)
من بعد ما نزل رجال المريخ وعاشوا ع الارض واتجوزوا بنساء الزهرة
عاشوا مع بعض فكان اغلب وقتهم في مشكلات منها مثلا
مريخي يقول : انا مش عارف اعمل لها ايه وارضيها ازاي
كل شئ مش عاجبها
بشتغل طول النهار عشان اوفرلها عيشة كريمة
وعشان اجيبلها كل اللي في نفسها
وهيا مش عاجبها
اعمل ايه تاني ؟
انا انسان مش مكنة
مقدرش اعمل شئ تاني غير كده
ترد الزهراوية وتقول :
مش بشوفه خالص
طول النهار مشغول مشغول مشغول
وقت مييجي عاوز ياكل وينام وبس
البيت بالنسبة له بقا زي الفندق
اغلب وقته في البيت يا ساكت يا يتفرج ع التليفزيون يا فاتح النت يا نايم
انا كمان مش متحملة ومش عاجباني العيشة دي
انا انسانة ... مش جماد
.....
هنا تسمع الاتنين هتلاقيهم عندهم حق في اشياء .. ومش عندهم حق في اشياء تانية
وهنا هنقولهم ان المشكلة هنا ناتجة من عدم فهم الرجل للمراة والمراة للرجل ..
ساعتها هسال الاتنين سؤال ... ودي على فكرة حصلت كتير وسبحان الله كانت نتيجتها واحدة ..
سالت الزوج والزوجة نفس السؤال
قلت لو الزوج جاب لزوجته هدية واحدة ب 100 ج ... هل تفرق عن انه لو جاب 1000 هدية كل هدية ب 1ج ...
كل الرجال قالوا اجابة واحدة اتفقوا عليها وهي :
طبعا مفيش فرق .. فالحالتين (100*1) =(1*100)
وطبعا كل الستات قالوا لا ... تفرق طبعا
فهدية واحدة عمرها ما تكون زي 100 هدية
فقلتلهم هنا الفرق اللي لابد نستوعبه
نظرة كل منا للامور
نظرة الرجل رقمية مادية قيمية بتتحسب انا باعمل ايه عشان اوفر ايه
يعني حبه بيظهره لبيته انه ميخليهمش محتاجين شئ
يعني حتى وهوا مشغول عن بيته بيحبهم بس بطريقته كرجل
وهيا محتاجة لزوجها ...
هيا مش آلة مهملة يحتاجها وقت ما يحتاجها لمده بسيطة ثم يتركها وينام
محتاجة للكلمة محتاجة للاهتمام محتاجة انه يطمن عليها اثناء اليوم
محتاجة انها تشعر انها على باله وفاكرها
محتاجه انه يرجع يسالها عن يومها يسالها عن صحتها يسالها عن اي شئ يخصها يحكيلها اي شئ حتى لو شئ مدايقة
بوضوح محتاجة تشعر انها كائن موجود في حياته
مش مجرد آلة او وسيلة اشباع من اي نوع
الاتنين محتاجين يفهموا بعض
يستوعبوا بعض
يقتربوا من بعض ...
ونكمل مرة تانية باذن الله مع المريخي والزهراوية ..
ليست هناك تعليقات